التسجيل عندنا مفتوح ومجاني ماحناب ماخذين منك ولا قرش ، وعشان ما تتوقف عضويتك في المنتدى اقر ضوابط وأنظمة التسجيل ولا تخالفها:

1- يمنع منعاً باتاً التطرق إلى المواضيع المخلة بالدين والآداب والعادات والتقاليد ..

2- عدم الخوض في مواضيع السياسة اللي تسبب مشاكل جميعنا في غنى عنها .

3-يمنع منعاً باتاً وضع الإيميل في التوقيع أو في المواضيع أو الردود أو التصاميم أو الصور أو أي قريح، واي عضو يحط ايميله بتتوقف عضويته بدون ما نقول له.

4-هاللي انت تبي تسجل فيه اسمه منتدى مهوب شات، يعني ان شفناك تسولف ولا تقلب مواضيع شات تراك بتتصفق ثم تتوقف عضويتك.

5- يمنع وبشده كتابة أي موضوع يتعلق بطرق تخطي البروكسي او فتح المواقع المحجوبة او طرق الإختراق .

6- عدم الإساءة لأي عضو مهما كان السبب .. يعني حتى لو غلط عليك احد من الاعضاء ما تجي ترد عليه وتهايط. .. الإدارة بيعرفون ياخذون لك حقك ويتفاهمون مع المخطي.. واذا جيت ترد وتهايط تراك بتنكرش لا تقول ما علمتونا.

7- مسموح الذب والتقطيع والإستهبال لكن كل شي بحدود وضوابط .. يعني بالعربي لا تمصخها وتتعدى مرحلة المزح لمرحلة الوقاحه.

8- منتدانا متميز بالهبال والفله .. يعني اذا سجلت لا تستغرب لو جاك احد يذب عليك او يمزح معك .. واذا كنت تتضايق رد وقل انك ما تبي احد يمزح معك .. يعني لا تسكت ثم بعدين تزعل من مزحنا.

9- ممنوع التسجيل بأسامي بايخه ومالها سنع مثل اللي تتضمن اسماء عوايل او قبايل او تتعلق بالدين او السياسة .. او التسجيل باسم عضو موجود في المنتدى أصلاً .. يعني لا تسوي ذيب وتزودها مدّه والا زخرفه .. وترا اللي يبي يسوي هالحركه نبي نحذفه ونخلي العضو القديم .

10- يمنع منعاً باتاً وضع اعلانات لمواقع او منتديات ثانيه .. مهوب تجي تحط موضوع فيه روابط لمنتديات ثانيه ولا تجي تقول زورونا ومدري ايش .. اي موضوع من هالنمونه بنحذفه بدون ما نقول لراعيه.

11- يمنع كتابة أكثر من موضوع في قسم واحد في اليوم الواحد .. عشان ما يصاب المنتدى بالخمول من كثرة المواضيع .

12- يمنع منعاً باتاً الإهداءات من العيال للبنات او من البنات للعيال في اي شي .. سواءً تواقيع ولا بطاقات ولا اي شي غيرها .. يعني باختصار ماله داعي التميلح ..

13- يمنع منعاً باتاً وضع الصور الشخصية في التواقيع او المواضيع او الردود .. والمقصود اللي يجي يتميلح ويحط صورته وهو كبير ومشخص ومسوي فيها زين .. يعني اللي بيحط صورته يحط له صوره وهو صغير ولا ماله داعي يحط شي . .

للإدارة الحق بإيقاف عضوية أي شخص لا يلتزم بشروط وقوانين العاذرية .. وذلك بدون سابق إشعار للعضو

اذا قريت الشروط كلها ووافقت عليها جب معك ملف اخضر علاقي (لا تسوي فاهم وتجيب ملف ابيض) + اربع صور شمسية لخشتك الماصلة وصورتين لسواق جيرانكم وابصم بإصبعك الدبي ...

واذا كملت اوراقك صف طابور مع ذولي ==>

ولا تساقط ترانا عارفين ذالحركات ..

ولا اقول لك حط صح واضغط (التسجيل) اسهل :)

أوافق على شروط التّسجيل في منتديات العاذرية .